• اون ایکی هجالي قوشغولار:
بو اؤلچوده اون هجالي اؤلچو کيمي چوخ يايغين بير اؤلگو اولماميشدير. لاکين هم چاغداش منظومه‌لريميزده. هم فولکلوريک نمونه‌لرده و هم‌ده ان اسکي قايناقلاردا بو اؤلچونون اؤزنکلرينه راست گليريک. دئمک هم آتالار سؤزلرينده، هم يئني شعريميزده و هم‌ده آبيده‌لريميزده بو اؤلچودن نمونه‌لر قالميشدير. بو اؤلچو عموميتله (4+4+4)، (6+6)، (7+5) و (5+7) بؤلگولرينده ايشله‌نليلميشدير مثال‌لار:
(4+4+4)
بري گلگيل/ باشيم باختي/ ائويم تاختي
ائودن چيخيب/ يوروينده/ سروي بويلوم
توپوغوندا/ سارماشاندا/ قارا ساچيم
(دده قورقورد کيتابيندان)
(6+6)
بير مخمورلوق سارار/ اطرافي، هرکسي
کسيلر حياتين/ او غولدايان سسي.
ايچر ايشيقلاري/ ظلمتين نفسي
يار بي ديلرم/ عشقين وئر، شوقون وئر
او مارام فضليندن/ عشقين وئر، شوون وئر.
مست ائيله سن مني/ بيلمه‌ييم من مني،
تا تاپا جان سني/ عشقين وئر، شوقون وئر.
(يونس امره)
• اون دؤرد هجالي قوشغولار:
جدوليمزين 6- نجي ساييندا قئيد ائتديگيميز اون دؤرد هجالي شعرلر، عموميتله (7+7) بؤلگوسونون مختلف حال‌لاريندا تظاهر ائدير. هم يئيني و چاغداش شعريميزده، هم‌ده ائل نغمه‌لرينده بوللو نمونه‌لري واردير. همين اساس بؤلگونون (3+4+3+4)، (4+3+3+4)، (4+3+4+3) و (5+2+5+2) بيچيملري واردير.
نمونه‌لر:
(7+7)
بير کز اوزونو گؤرن/ عؤمرونجه اونوتمايا،
تسبيحي سن اولاسان/ اول آيروق يول توتمايا.
طاعت ائدن زاهيده/ نظرين ائدر ايسه،
اونودا تسبيحيني/ محراب سجده ائتمه‌يه.
(يونس امره)
• اون آلتی هجالي قوشغولار:
اون آلتي هجالي اؤلچولرين بيرينجي اساس بؤلگوسو (8+8) و ايکينجي اساس بؤلگولري (7+9) و (9-7) بيچيملردير. لاکين عموميتله بيرينجي اساس بؤلگو و بو بؤلگونون (4+4+4+4) بيچيمي ايشله‌نير. بو بؤلگويه مختلف متنلرده راست گليريک.
نئده‌م من بو کؤنول ايله/ منيم ايله بئله دورماز،
معشوق اوزون گؤردومگر/ اؤيود لنيب اؤيود آلماز.
کؤنلوم منه يولداش ايکن/ زؤهد و طاعت قيلير ايديم
ييخيلدي بو ترتيبلريم/ کؤنولسورم، اليم ائرمز.
(يونس امره)
(4+4+4+4)
آرخ ديبينده/ آغ گئيينميش/ گؤيومتول بير/سرو آغاجي
قاراقيشا/ هئچ باخمادان/ يو کسلميشدي/ باشدا تاجي
اوره گينده/ قورخو عسکر/ يؤنه‌ليردي/ اونا ساري
آزاد سروين/ ئونونده او/ اوخويوردو/ آراز باري
(اوچغون داخما)
بوردا بيزيم «جوت هجالي قوشغولار» يميزين ايضاحي قورتارير. البته شعريميزده اون سگيز هجالي و ايگيرمي هجاليلاردا ايشله‌نميشلر لاکين اونلاري باشقا اؤلچولرين ترکيبي حساب ائديريک. مثلاً اون سگيز هجالي اصلينده بير سگيز هجالي و بير اون هجالي (8+10) بؤلگولردن قورولموشدور. ايگيرمي هجالي اؤلچو ايسه شعريميزده آز ايشله‌نيلن بير اؤلچو کيمي دگر لنديريلير.
جوت هجالي قوشغولاردان سونرا، تک هجالي قوشغولارين ايضاحينا باشلاييريق.